圍爐主持，你哋好！
我老公係喺疫情初期失業，當時我哋決定我就繼續依家份工，而佢就留喺屋企照顧個女，阿女嗰陣時啱啱開始N班（幼兒班）。事實上呢個安排進展得意外地順利 。老公負責晒接送阿女返學放學，同埋起居飲食，跟功課測驗。但問題係自從佢接手做阿女主要照顧者呢個角色之後，唔知點解我覺得佢已經冇以前咁有吸引力，個人亦都婆媽咗。有時候我感覺好似同喺家長Whatsapp 群組啲家長生活咁。
依家我做公務員，都算令到我哋一家嘅生活方式安穩舒適，加上呢兩年嘅經濟環境，老公喺香港再做番老本行比較困難。
你哋有冇方法幫到我哋嘅關係可以重拾番熱情同火花呢？我一方面都想佢keep住同個女建立咗嘅親密關係，但我亦好掛住以前有吸引力、冇咁婆媽嘅老公！人的確矛盾。
我呢排都諗，定係呢種愛火花唔會再重拾得返呢？
希望你哋能夠讀出我嘅來信，解答我嘅疑難。感謝！
忠實聽眾Gigi上
/
