四位主持你哋好，非常鐘意聽你哋嘅節目！
先講講我嘅難題：我今年28歲，大約喺兩年半之前，由香港搬到英國曼城，但我而家感到有D無助同迷失。最近之前嘅男友同我分手，佢話其中一個原因係佢覺得佢「真係唔太認識我」。
而家，我喺曼城開始同另一個教會認識嘅弟兄拍拖。而令我震驚嘅係：佢一樣都話佢唔感覺到佢真係認識我［即使我哋已經拍咗拖個半月］。老實講：我自己亦都唔太認識自己。我一向都覺自己比較保守，好難真心表達自己，自從嚟到英國後，對我嚟講更加係一個挑戰。
我喺香港大，屋企好傳統吓，家人都唔多表達內心情感。所以我都好難做到同人打開個心。而要去適應曼城教會弟兄姊妹同新朋友交心文化，呢兩年嚟就更加困難。我通常同人分享，都係啲D表面嘅嘢。而自己亦傾向避免衝突，因為我怕如果有碗話碗，只係會令情況更壞。
好唔鍾意而家呢種奄奄悶悶嘅感覺。我想同人建立有意義嘅關係，我想率真但就係唔知道應該點樣去打破自己而家個模式。唉。你四位可以教吓我嗎？希望可以聽到四位嘅解答。祝好！
Ming Ming 敬上
/
