主持：李家豪 · 蘇賡哲 · 麥之華 · 朱福強 · 薛梅
*今集聽眾來信*
蘇生、家豪、朱Sir、之華姐：
我係你哋喺澳門嘅聽眾。聽你哋節目經常刺激我大腦思考。獲益良多。好正呀。
舊年我做咗我老死個BB女嘅契媽。我未做契媽之前，周不時都同BB女一齊玩，而正式做咗契媽之後，老死好似成日都叫我照顧BB（但老實講，間唔時玩吓BB就OK ，但成日要照顧的確唔多enjoy）。
通常我一收到佢電話，請我上去佢屋企食飯飲湯，但當我到咗之後，佢通常就忙住家務，佢老公通常收工又比較夜，而我就要留喺客廳應付兩歲半嘅契女。契女好多時都會鬧情緒，我就好多時就要出盡渾身解數，去氹佢安撫佢。
等坐得低食飯飲個湯嘅時候，每次都真係好鬼攰。辛苦返咗成日工之後，照顧多個細路女都真係好似返OT。我幾掛住，之前放咗工可以一個人啤啤佢或者同幾個同事去happy hour。
其實我慢慢感覺到，老死好似係因為我單身無小朋友，所以就覺得我應該有好多時間照顧吓契女。但呢個唔係我做契媽嘅原因！我點樣先可以同佢解釋我雖然身為契媽，但真係需要更多私人時間、要平衡啲，而又唔會得失佢，或者覺得我係一個唔稱職嘅契媽/我唔支持佢（畢竟大家難得由細玩到大）？我唔想我哋嘅友誼淨係圍繞照顧契女契女契女，但而家的確變咗係咁。
封信太長，感謝讀出。繼續支持你哋。
「煩惱契媽」Shirley
/
